廣東少開

楊仲文

“小開”兩字，到了上海廣東人嘴巴里就變成“少開”，寫出來多了一筆。“開”字發音相同，只是“少”字用粵音讀出，又是一種洋涇浜。迭格“少”字，可以用現在流行格CEO三個英文字母拼讀，如勿相信可以當面問問廣東人。

上海廣東人拿小開讀作少開是一個特色，另外一個特色就勿大有人曉得了。傳統上，廣東大人家屋里無論有多少個兒子，總歸還要再去買一個男小囡轉來！介許多“少開”當中，大老婆生格叫嫡出，小老婆生格叫庶出，買轉來格呢就叫做繼出，迭些格族譜里寫得明明白白。啥體有了親身兒子還要買格外頭兒子呢？迭格是因為根據老祖宗多少年來傳落格教訓：但凡大人家生活優越子孫必定不思進取格多，勿大肯發憤圖強，弄得勿好子孫勿肖，好好較一份人家儕敗光！買了另外一個“繼少開”轉來，勒拉家族里擺明是個邊緣人，連得屋里點貓狗眾生都看勿大起伊！勿是講逆境出人才嗎？迭格“繼少開”就必定會得努力打拼，迭能賽過買了一份家族保險，將來一家人家就好由“繼少開”來榮宗耀祖繼往開來。

順帶便講一句：廣東少開是萬萬勿好當面叫“二世祖”格！其一，“二世祖”迭三個字是刻勒家族墓碑上頭格用詞，哪能好用了活人身啷？其二，廣東人嘴里格“二世祖”是個貶稱，同“敗家仔”差勿多，但凡講到“二世祖”三個字，只好背后頭藏否迭格少開勿沒出息，如果當面稱呼“您二世祖吩咐……”迭格是學香港電視劇學豁邊哉。

記得屋里有位老長輩，當年伊勒拉南京路四大公司大新、新新、先施、永安公司里廂蠻有點立升（分量）。伊每到新雅、荃香茶樓去飲茶，熟悉點親朋好友碰著，當面搭伊打招呼：“耕田佬，精神爽利！”迭句閑話勿要講上海人聽勿懂，就是邊啷我迭格小廣東也莫名其妙：南京路啷幾化鬧猛啥地方好耕田呢？原來迭位上海灘啷有點名氣格廣幫大佬，伊就是一位“繼少開”，小辰光買伊轉來格繼爺落實祖宗教訓交關到位，拿伊送到廣東鄉下佃戶處粗茶淡飯，赤腳種田，鍛煉幾年再回城里廂來讀書上學……曉得伊迭段底細格就俾伊起了個花名（綽號）“耕田佬”，自細叫到大。“耕田佬”不負繼爺一番苦心栽培，長大之后知書達理，生意上幫得“老竇”（老爸）一把。當年伊屋里廣州開爿酒樓生意紅火，就有黑勢力硬搶豪奪！“耕田佬”親自帶幫伙計（員工）固守二樓，吩咐庫房里抬出幾簍油來，用毛巾沾了油搨了一把把筷子上，然后拿大批油筷子順了樓梯鋪滾落去。下頭點黑幫分子踏著滿樓梯油光滴滑格圓圓筷子根本覅想攻得上來，一探頭樓上就拿茶杯碗盞家什砂鍋蓋頭嗶哩吧啦厾下來！二樓樓梯口“耕田佬”高舉一把大大格斬肉刀一夫當關，后頭一幫員工有拿切菜刀，有拿掛爐烤鴨格鐵叉，有拿板凳扁擔人人嚴陣以待……樓下黑幫攻勿上去就吵了要放火燒！驚動街坊報官調停，迭樁事體才算擺平。從此以后，“耕田佬”勒家族里穩穩立牢腳跟，大小事體儕由迭位“繼少開”揸（拿）主意。后頭幾年運作資金到上海發展，終于成為滬上一位名副其實格廣幫大佬。

“耕田佬”也照老規矩，廣東鄉下頭買了一個“繼兒子”帶到上海來，倒是嘸沒送伊去耕田，開部機器腳踏車（摩托車）勒拉虹口外國人開格“雷樹得無線電學校”讀大學（下文為了敘述方便，阿拉就稱迭位小“繼少開”為老鄺，從頭講到底）。有日天老鄺對伊個爺講：“儂拿俾我討家主婆點鈔票俾勒我，我拿學堂里一套無線電臺買落來帶得去從軍抗日。”原來老鄺迭位廣東少開刺激受得深！伊平常辰光一淘踢球格好朋友叫“小黑炭”，是個南洋華僑，抗戰爆發就去報名當了空軍。格辰光東洋人有只大兵艦“出云”號，停勒吳淞口耀武揚威，凡是有血性格中國人無不恨得咬牙切齒！一趟“小黑炭”開了飛機來炸脫伊，想勿到飛機受到重創，伊就連人帶機一頭撞了“出云”號艦橋啷！格樁以身殉國格悲壯事跡上海報紙啷登出來，“廣東少開”老鄺坐勿牢了嘛，就同班上一位山東籍同學商量了買部電臺一淘帶得去投軍抗日。老鄺還對自家格未婚妻講了。迭位“少開女”個爺勒拉虹口廣東街開了爿蠻大格生菓行，十六鋪還有一家廣東南貨批發棧，伊本人是晏摩氏女中格籃球隊隊長。未婚妻就講：“我拿自家格嫁妝銅鈿也交俾儂去打東洋人，格輩子非儂勿嫁，定規等到儂勝利歸來。”迭些閑話今朝子只有電視劇里聽得到了，勒拉當時國難當頭，實在不過是頂頂普通個一句閑話。

迭樁事體最后得到了學堂里一位有正義感格英國教師幫忙，以“到青島試辦分校”為名，拿迭套無線電臺先運到停勒吳淞口一條意大利商船上，然后老鄺同山東籍同學兩家頭坐只小舢板人再駁上去，兩個熱血青年就坐船帶了電臺到青島上岸，最后由山東籍同學一路安排，坐部馬拉格打車到了一支部隊格駐地。老鄺迭辰光才曉得此地是山東大名鼎鼎格韓復榘部隊，老韓看到兩個學生軍來了還帶了套外國貨無線電臺來，喜出望外，馬上封老鄺為上校電臺臺長，派了個長長大大格馬弁挎了根盒子炮保護伊，又派了一個矮矮小小格勤務兵服侍伊。迭位山東籍同學是國民黨黨員，就留勒軍部當了一名參謀。

投身抗日的興奮勁過去之后，有天山東籍同學來看老鄺。支開兩個貼身小兵之后，老鄺就講迭支部隊打日本人勿積極，專門跟八路軍搞摩擦，而且還跟偽軍漢奸部隊勾勾搭搭……因為軍部電報來往儕要通過老鄺迭部帶得來格無線電臺，因此伊多少曉得眼情況。想勿到山東籍同學回去之后，半夜里兩個小兵拿老鄺搖醒了講：“山東同學回軍部報告了韓復榘，明朝天亮就要拉你去槍斃。”嚇得老鄺是魂飛魄散不知如何才好。兩個小兵就幫老鄺套上一件山東大棉襖，伊拉自家也是老早換了便裝，講：“我們不如去投奔八路軍呂正操部隊吧。”拉了伊就朝門外頭走。

老鄺俾兩個小兵一左一右夾牢仔昏頭六沖走，路上有點高低上落還要小兵一個前頭拉一個后頭推，腳高腳低跌跌沖沖走了大半夜，天蒙蒙亮三個人來到一座城門前頭，只見一個小軍官帶了幾個兵勒拉盤查進關點人。老鄺低仔格頭扛起兩個肩胛，兩只手抄勒棉襖袖籠里，生怕俾人家看到雙手細皮嫩肉，緊跟仔兩個小兵后頭混進人堆里慢慢較朝前蹭。輪到老鄺前頭兩個小兵了，軍官也是老鬼（有經驗），一眼就看出迭兩個是當兵格坯子，拿伊拉頭啷兩頂破氈帽一掀，見到額角頭上清爽格帽印，馬上大喝一聲：“媽拉個巴子，逃兵，槍斃！”只見大個子馬弁胸膛一挺，行個標準的軍禮朗聲說：“報告長官，我們是改換門庭投奔中央軍來的，你帶我們上前線去殺鬼子吧！”軍官一聽就說：“中！”這支隊伍連日來同日本鬼子廝殺傷亡很大，有兩個生力軍來補員當然好，軍官又說：“入列！待會下哨一起走。”

輪到老鄺，伊勿會講山東閑話就咿咿呀呀裝啞子，兩只手往袖籠里插得更加緊，軍官聞到老鄺身啷大棉襖發出格一股濃濃的大蔥味和土煙味，晨曦中看到伊墨黑油光件大棉襖，領頭上爬滿了一圈老白虱，就揮揮手讓伊進城了。老鄺連忙點頭哈腰三步并作兩步走，連回頭看一看自家兩個小兵都勿敢，就迭能同伊拉分開了一世。

當年山東人曾經自豪地講：“咱們皇帝老兒身上都有幾只御虱。”可見迭種小爬蟲的猖獗！老鄺身啷件大棉襖昨日夜里剛剛從老鄉身上剝落來，趕夜路走得急，身啷出汗冒熱氣，大棉襖夾夾縫縫里點老白虱就一起爬到領圈口頭來透風涼，墨黑格衣裳襯出密密麻麻白花花一圈，軍官看見哪能勿叫伊肉癢，故所以馬上揮揮手叫老鄺跑，生怕介許多老白虱野兩只到自家身啷！老鄺急匆匆進城走了一程，直覺得頭頸里癢，用手一抓，幾只白白胖胖格老白虱就捏殺了手里廂，看到了更加覺得渾身奇癢，連忙走兩步鉆進小巷里尋個避風格角落蹲下來。脫了大棉襖，手忙腳亂一把把拿棉襖領頭上格老白虱嗶哩吧啦捏殺脫。抖了抖大棉襖又披上趕路，迭才明白剛剛格軍官揮手叫伊跑格辰光面孔啷為啥是實梗厭惡格表情，真是圣母瑪利亞，觀世音菩薩大慈大悲啊。

上海人講格老白虱，恐怕現在好幾代人都勿曾看見過甚至聽說過。老白虱學名叫虱子，最大也不過一粒芝麻大小，灰白顏色，扁平無翅，眼睛退化，勿會飛勿會跳，只會慢慢爬動，是哺乳類動物體外寄生蟲，大約有五百多種，人虱只是其中一種，長有刺吸式口器，被咬后奇癢，還會傳播疾病。看過魯迅先生《阿Q正傳》格總應該有印象，未莊幾個閑漢，阿Q、小D、胡子幾個太陽底下捉虱子，還比賽啥人捉得多格場景。阿拉老祖宗老早就熟悉迭種體蟲，《晉書·阮籍轉》寫道：“……獨不見群虱之處（在）褌中？（褌，kūn坤音，有襠的褲子）逃乎深縫，匿于壞絮……”于是就有了“虱于褌中”一句成語，拿虱子作比喻：躲在褲襠里，行不敢離縫際，動不敢出褲襠。迭副樣子，人格世俗生活是多么拘窘局促啊！交關形象生動。

自出娘胎我也是到了廿幾歲才見到老白虱格可憎面目，有趟出外景到山東農村拍戲，勿懂事體著了件絨線衫去，回到上海看見交關老白虱鉆勒絨線衫一針一針格縫縫隙隙里勒拉動。正發愁中，老演員朱莎大姊就教我一個法子：院子里尋棵大樹，拿件絨線衫平攤勒樹底下向陽格草地上，一夜天下來，螞蟻就會來拿一只只老白虱扛轉去，妙格是螞蟻還會得拿老白虱撒格籽（卵）也一粒粒搬得清清爽爽。儂人捉，介許多老白虱捉到啥辰光去？用突突滾格開水燙，老白虱燙殺脫死勒絨線衫縫縫里更加討厭，請小螞蟻幫忙迭格辦法頂好！副導演張惠軍講：“老白虱叫做革命蟲！”因為伊從山東一路打過長江進上海，伊教育我講：“過去參加革命行軍打仗誰身上沒有一把虱子？如果查到一個人身上沒有虱子，這個人不是漢奸就是特務，肯定是反革命！”有人看到此地大概會得渾身弗適意，格末再講一樁事體：我有位學姊當年主演《金沙江畔》迭部戲，勒拉外景地生了一頭老白虱，結果大家勿叫伊《白雪公主》而叫伊《白虱公主》哉，儂聽了更加要頭皮發麻了。

講回到廣東少開老鄺終于嘸沒成為一個老山東，帶了渾身老白虱回到上海屋里，可嘆一腔抗日激情就此戛然而止，老鄺投身抗日的內容忒單薄，今朝拍一集抗日神劇都勿夠。中華人民共和國成立以后，老鄺勒拉南京路“中央商場”做一名普通員工，修修各種舊電器過日腳。后頭“文革”一來，老鄺就馬上被揪出來批斗，定伊歷史反革命、國民黨反動軍官、特務三頂大帽子。前頭兩頂老鄺一口承認，講伊特務伊死也勿承認，為之批斗會上還吃過生活（挨打）！迭點政治常識介許多趟政治運動下來大家儕明白：歷史反革命反動軍官是歷史問題，特務是現行問題，最后處理起來結果是一個天一個地。革命群眾當然勿會放過伊，當時格邏輯：蔣介石反動派逃到臺灣去了，哪能指揮特務？必定通過無線電臺，推理結果是凡是同無線電臺搭過界格人板定是特務！老鄺再哪能喊冤枉也嘸沒人聽，大家舉起拳頭拔直仔喉嚨喊口號格場合，啥人會得來厘清界定老鄺搭界無線電臺格時間段呢？上海一解放老鄺就主動去市公安局登記過迭段反動歷史，后頭歷次運動儕是維持公安局格原結論：“不予追究不作處理。”介許多年下來也嘸沒啥格檢舉揭發新材料，屋里兜底翻抄家只查著一只老式RCA收音機，里廂收聽短波部件老早俾老鄺自家拆得干干凈凈。老鄺平常做生活（工作）埋頭苦干勤勤懇懇，閑話勿多，造反派想象牙里扳雀絲也無從入手，斗過幾次大會小會老鄺徹底是只死老虎。造反派就扣脫伊工資發生活費，每天打掃廁所，有辰光喊伊扛扛重物什，除此以外基本上是摜（丟）了一旁邊。

直到有一天，造反隊接待了兩位解放軍軍官。“文革”辰光強調恢復老傳統，官兵平等，大家儕沒有軍銜，只是小兵只有上裝兩只胸袋，軍官下頭多兩只袋袋，現在看得到格樣板戲里就是實梗（這樣）。軍官從黑顏色拉鏈公文包里拿出一張中央軍委介紹信，上頭只紅星章有茶杯蓋頭介大。兩位講閑話交關客氣，一口一聲“向上海工人無產階級革命造反派致敬！”但是態度交關嚴肅，關起門來單獨審訊老鄺，講是軍事秘密勿讓造反派參加。交關年數以后老鄺才講出來，當時勒拉解放軍帶來格公文紙頭上寫了份交代：“……一個是馬弁一個是勤務兵，平日里都在我眼前用心學習無線電技術，從未做過打共產黨欺壓老百姓的事。當初商定三個人一起去參加八路軍呂正操部隊，中途失散就此不知下落。”現在看來老鄺交代里廂加了水分，因為勿是三個人商定，而是兩個小兵講，“要槍斃你了，我們帶你去投奔八路軍！”老鄺實梗寫是為了表白自家投奔八路軍格主動性，迭格是好勿容易抓牢一根救命稻草死勿放了。實在是形勢所逼，也勿好怪伊。

審訊結束，兩位解放軍對造反派講了，“我們偉大統帥毛主席親手制定‘三大紀律八項注意有一條就是‘優待俘虜，現在鄺某人就是我們的俘虜，要優待他。不得隨意打罵，工資照發，有病要看，安排力所能及的勞動……特別注意保守軍事秘密，任何人不得過問他的案子，保證他的生命安全，提高警惕不能讓一小撮壞人干擾斗爭大方向，將‘無產階級文化大革命的斗批改任務進行到底！”

中央商場勒拉南京路商圈里實在忒嘸沒名堂，人又少，平常格革命運動勿過是跟勒南京路啷幾個大格造反組織后頭軋軋鬧猛，今朝中央軍委直接來布置任務，造反派頭頭激動得勿得了，馬上召開“認真執行中央軍委指示大聯合”會議來研究迭項革命工作。迭格會開得邪氣有必要，會上大小造反戰斗隊一起向毛主席表忠心，堅決執行中央軍委指示勿動搖！自此以后，老鄺工資照拿，有啥勿適意可以請病假，食堂里排了革命群眾隊伍后頭吃“優待飯”，每天由兩個造反隊員“押送”伊上下班保證路啷勿出啥格意外，甚至廁所門口擺了張凳子，椅背上貼張紙頭寫了“優待俘虜凳”，關照老鄺掃廁所吃力了可以上頭坐脫一歇……就此再也嘸沒人來審問伊批斗伊，老鄺就實梗“被優待”到“文革”結束。

改革開放前頭上海賓館酒店邪氣少，錦江飯店是交關高檔格地方，尤其里廂格錦江小禮堂一般人是進勿去格。有天中央商場領導叫老鄺到錦江小禮堂去一埭（次），老鄺以為是叫伊去修里廂格擴音設備，背只電工包就去了。進到小禮堂門口，有個著軍裝格首長老遠就啪一個立正敬禮，連跑幾步過來拉牢老鄺格手就講：“鄺臺長，可想念你了！”老鄺看了看勿認得，首長就講：“鄺臺長你認不得我了，我是李狗子啊。”原來迭位首長現在挺了個將軍肚，人又矮，胖得來橫里直里一樣大，哪能還看得出當年山東勤務兵格影子了呢？吃飯辰光首長講：“當年要不是跟著鄺臺長學習無線電技術，我哪有今天？來來來，敬你一杯！”人嘛，總歸有辰光要轉轉彎，首長今朝總還勿見得講講自家做勤務兵端尿盆子格事體了嘛。首長又講，“‘文革當中軍內造反派揪他在韓復榘部隊做軍運的這段歷史，那個大個子后來犧牲了，就只有你鄺臺長一個人可以證明，幸虧找到你給我寫了這一份證明，可是至關重要啊！”老鄺迭辰光才明白，當年兩個人勒拉門外頭聽壁腳，曉得自家對韓復榘消極抗日不滿，伊拉商量好嚇自家要吃槍斃，好帶儂去投奔八路軍，原來兩個人老早就是地下黨了。反過來“文革”當中自家受到種種優待，也應該是從格樁事體當中引出來。幾十年格事體來來回回，真是老天爺命中注定啊！

后首來老鄺搭自家老愛人講起，交關感嘆，伊講：“看看‘文革當中一點親戚朋友過格日腳，格個是真生活啊（艱難）！我是涼棚下頭躲雨，總歸要落濕點。還算好，優待了介長一段辰光……”