上海人副“吞頭勢”

楊仲文

開放以后到了美國洛杉磯，有趟華人聚會，一位老先生過來用地道格上海閑話對我講：“迭位先生是上海人吧？我也是上海來格，隔日方便想請儂吃頓便飯……”飯桌啷我才曉得伊過去是國民黨一位師長。伊問我：“出來卅年了，上海俾改造得哪能？”我回答伊：“變化蠻大，有機會回去看看呢。”想勿到伊嘆了口氣講：“唉，隨便哪能上海人副‘吞頭勢是總歸改造勿脫格啦，勿然我會得一眼看出儂是上海人。”口氣里廂透出對上海格無限依戀。

當年白話文運動主帥胡適先生提倡寫文章要多用口語、俗語。“吞頭勢”就是上海閑話里格口語俗語，問題是口語俗語里廂交關“有音無字”寫勿出，胡先生哪能勿講明白如何做到“有音有字”呢，格末“吞頭勢”三個字只好我自家造出來。上海閑話用到“頭勢”兩字格地方勿少，比如：老阿奶講，“小囡白相迪士尼吃力了，看伊格睏頭勢”，寶寶正睡得又香又甜。外婆看到大外孫長發頭啷會得吃，日長夜大老人看了開心，也會講，“吃頭勢真結棍，一口氣好吃三塊紅燒大排骨”。還有阿姨講，“迭格小毛頭哭起來兇頭勢，就是要人抱”。弄勿好上海小美女會得嗔一句男朋友，“儂迭格人煩頭勢，阿拉勿睬儂”。如果講到“迭格人頭勢煞清”，是指男士兩根頭發梳得規規齊齊，意思儕勿好搞錯脫。

“吞頭勢”同以上講格各種“頭勢”又勿大一樣，哪能講法子？上海人出上海，著了當地人衣裳，哪怕勿用講一句閑話，立了嗨，一定會得俾人家認出來是個上海人;梗轉來講，外地人到上海，穿了一身淮海路（千萬勿是南京路！）大店家買來格貴（滬音ju）衣裳，勿用開口也一定俾另眼看待。上海人自有一副“上海人格吞頭勢”，迭格一眼也勿會搞錯脫。

口語、俗語格地域性交關強，“吞頭勢”三個字真嘸沒辦法轉成普通話，加上去一連串解釋說明啰里八嗦半日天也未必纏得明白，倒是英文里有個字Temperament，是指一個人秉性、身體和精神各方面的特質，中文解釋為“氣質”。一個人氣質好，必定有內涵有外表，俾人家一個好印象。老話講得勿錯，“有諸于內，形諸于外”，外頭格神態，里廂格修養儕包括了。一個人氣質包括四方面：一、思想深度（Thinking）;二、言語談吐（Conversation）;三、行為舉止（Behaviour）;四、儀容儀表（Appearance）。迭四方面倒勿是與生俱來而是后天形成，講娘肚皮里帶得來是句笑話。一切儕是后天知曉和獲得，因此，教育就是重中之重格因素。

一百多年之前上海開埠，多少西方商人、傳教士、冒險家涌到上海，上海人勒拉（在）迭種中西政治、經濟、文化大沖撞中最早接觸到西方文明。出于殖民化要求，一批又一批到上海灘格西方人通過教會活動辦起了學校，上海人逐漸接受了西方現代教育。歷史上整個江南地區傳統文化非常發達，西洋文化進入中國，上海領先“西學東漸”潮流，實梗格開放過程以及東西文化交流對話格機緣巧合中，江南文化加上西方文化，華洋一體，本土創新，鑄就了有名格海派文化，迭格是歷史的積淀與饋贈，也就形成了“上海人副吞頭勢”。

籠統一句“上海人副吞頭勢”，上海人自家講起來自有豐富的內涵，今朝有辰光會得聽到講，“倷勿要看老先生現在格賣相，憑伊副吞頭勢就曉得是‘圣·強勢出來上海灘啷最后一代老克勒”。經過風風雨雨，老先生身啷還留存了副“圣·強勢”吞頭勢是哪能回事體呢？

“圣·強勢”是以前上海圣·約翰大學（St.John's University）格簡稱，曉得格上海人儕叫“圣·強勢”，講“圣·約翰大學”反而勿曉得儂講點啥。迭所教會大學1879年誕生于上海，一百多年之前是中國第一所跟國際接軌格高等學府，第一個將西方現代教育引入中國。“圣·強勢”用全英文授課，開設科學、哲學和藝術教育課程，十分強調禮儀、體育和課外活動，集中交匯之下，學生綜合素質交關高，可以免試進入美國耶魯、哈佛和哥倫比亞頭牌大學深造。近百年來“圣·強勢”出了著名外交家顧維鈞、施肇基、宋子文，文學家鄒韜奮、林語堂、張愛玲，大師貝聿銘、周有光，還有紅色資本家榮毅仁、劉鴻生、黃炎培等等，名字一大串寫也寫勿落。“圣·強勢”首創“榮譽制度”（Honour System），考試勿設監考！學生自家考卷上聲明：“此番大考，未曾助人，亦未嘗求助于人”。幾化自豪。“圣·強勢”嘸沒啥叫“作弊”兩個字，出來的人講榮譽誠信，自尊自愛，自律自信，由此可見“圣·強勢”帶來副“上海人格吞頭勢”了。想勿到上海“圣·強勢”一百多年之前實行格迭個制度，還傳回美國本土去，我同囡圄兩代人美國讀書格大學里也實行“榮譽制度”（勿是每所大學），現在更加自由，大考辰光高興啥地方做考卷儕好去，圖書館實驗室，校園草地上，小咖啡館里，儕是埋頭做考卷格人，反倒是課堂里空啷啷，嘸沒幾個同學，收考卷位，助教老兄坐了。

盡管“圣·強勢”里廂交關政商名流后代，或者富家豪門子弟，小開女小開官二代富二代撈一把揀揀，但是1925年上海“五卅慘案”發生，上海各界市民紛紛走上街頭抗議帝國主義殖民者罪行時，“圣·強勢”師生也組織了抗議，但是受到校方阻撓，于是在6月3日，就有553名學生和全體19名華籍教師集體宣布脫離“圣·強勢”，搭儂從此勿搭界，幾化彈硬！迭樁事體當時轟動全中國，國際上也曉得了，影響交關大啊！過了三個月，在全上海各界支持下（其中勿少是學生家長），迭批脫離“圣·強勢”師生成立了中國人自家格大學，叫“光華大學”，“光耀中華”，迭格名字起得幾化響亮！回顧“上海人副吞頭勢”里廂，實事求是講，“崇洋”是有格，否則也勿會以“圣·強勢”副“吞頭勢”來界定“老克勒”。講到“媚外”倒勿好一棍子打殺，接受西洋文化但又時刻勿忘記自家是迭塊土地格主人，應該講是“崇洋勿媚外”，迭格底線“上海人副吞頭勢”里廂總歸還是要講究格。

講到接受西方文明，勿光是教會大中小學堂，或者吃洋行飯坐寫字間，還有海關銀行大醫院里廂，華洋雜處，彼此影響。就是老底子淮海路錢家塘里，總歸可以見到一個白俄，西裝襯衫領帶，皮鞋擦得锃亮，手里夾一副黑皮面格大文件夾，走起路來腰板挺直，客客氣氣一路啷搭弄堂里格老鄰居用上海閑話打招呼。勿曉得格人還以為伊是音樂學院教琴格老師，或者跳舞廳里格“洋琴鬼”（伴舞樂師），當作伊文件夾里是一張張樂譜。其實伊是淮海路啷上海灘有名格“萬興食品店”隔壁的“克萊夫特”面包店格烘焙師，大文件夾里是做各式面包蛋糕美點格用料配方！盡管是流落上海灘啷一位普普通通面包師傅，但尊重自家職業，活得光生體面，格點道理現在大家儕蠻講究了：人應該體面而尊嚴地生活著，體面出自對生活的自我把握，尊嚴來自人的文明覺醒。“上海人副吞頭勢”里廂，迭點教養是明顯有點年頭了。

格家“克萊夫特”每日天新鮮出爐格面包好吃到20世紀50年代中。店名是英文CRAFT音譯，是指行業、技藝。加了尾綴是Craftsman，手藝人、工匠、匠師。今朝又重新提倡工匠精神，迭爿面包店格店名啊是起得好。上海人一向尊重技藝，手里廂有生活（有技能）的人，廠里廂稱作“八級技工”，是老受尊敬格。迭種環境氛圍下頭，也是現實生活所逼，要捧牢自家只飯碗頭就要靠自家格技術水平。大而化之，上海迭座魔都追求格是技藝精湛，直到今朝“上海制造”在全國具有不可動搖的聲譽。無論啥個行當，上海人對自家格專業有足夠自信，體現了現代商業文明城市特征，“上海人副吞頭勢”也就出來了。

上海是一座移民城市，也是中國江南文化的集大成，迭些移民在日常生活中帶來了許多口語、俗語，雖然是街頭巷尾市井俚語，但是融合成海派文化之后，多姿多彩，活色生香。

比如：張家好婆講，“囡囡，笑破勿笑補啊”。一件衣裳傳落來，破脫了補一補汏干凈著了身啷嘸沒人會得笑，倒是破了勿補格個屋里廂大人懶得出蛆了（今朝潮流襤褸裝，存心著破扮酷當作別論）。還有樓啷阿娘講，“女要俏，常帶三分孝”。上海人衣裳打扮講究素雅為上，老底子用陰丹士林藍布做個旗袍最清靈逸致。陰丹士林是一種德國染料商業名稱，染出布來海藍顏色悅目明亮，色牢度又高，汏了幾出水之后藍顏色更加幽雅樸茂，純凈婉約。過去南京路永安公司女售貨員一律著迭種陰丹士林藍布旗袍，小報記者湊趣寫作“勾魂藍”，倒也一點嘸沒夸張。否則也勿會上演現實生活中格一出浪漫社會劇《康克令小姐》，大律師章士釗先生也就抱勿到一個掌上明珠含了嘴巴里怕煬脫（溶化）了。還可以聽見亭子間嫂嫂關照，“寧穿破，勿穿錯”。著衣裳打扮要看場合，有件好衣裳勿管三七廿一來煞勿及到處去賣樣要俾人家笑！記得也是出國初，洛杉磯美中友好協會請得去BBQ（巴比Q，庭院燒烤聚會），來了幾位國內出來格官太太，一色旗袍高跟鞋，結果從開始到末腳聚會上伊拉立也勿是坐也勿是，弄得阿拉幾個上海人邊啷尷尬煞！前面講格幾句閑話雖然是家長里短，市中井旁，但是仔細忖忖，真是讓上海小囡從小就懂得了“勿怯窮，勿炫富”，不卑不亢有底氣格道理呢，實梗一來“上海人副吞頭勢”就出來了嘛。

上海人交關講究賣相、派頭，老人會得講，“人有辰光難免交‘霉運，但是千萬勿好有‘霉相”。“文革”當中上海電影制片廠一大批老克勒儕倒霉得一塌糊涂，口號震天格批斗會啷一個個掛了牌子低了頭立了嗨，只見幾個有頭發格“卅年代反革命文藝黑線黑幫分子”，像著名攝影師黃紹芬幾位，依舊是根根頭發梳得一絲勿亂，廠里造反派倒是熟視無睹，氣得來兩個北京男女紅衛兵跳上臺去拿伊拉頭發儕弄弄亂，講：“打掉他們的反革命氣焰！”現在看看幾化好氣又好笑。伊拉外地人勿曉得“上海人副吞頭勢”就是實梗，越是倒霉越要面凈發潔，衣整鞋亮，再困難格日腳還是要保持自家格體面，迭格真是海派文化里格強勢語言啊。記得小辰光屋里賬房先生老寧波話過，“人免勿了要‘背時（讀倍音），隨便哪能勿好‘背德”。上海閑話“背時背德”是寧波閑話里移過來，四個字連了一淘用。賬房先生特為格能講，強調指出時運不濟了勿可以背叛道德底線！做生意要規規矩矩老老實實，傷陰騭（zhi，滬音讀“節”）格事體萬萬做不得！偉大的古希臘哲人亞里士多德講：“行德使人成為良好公民，知德使人獲得幸福生活。”同賬房老寧波講格真是一樣格道理。

上海人嘴巴里還有一句“親兄弟，明算賬”，但凡涉及錢財，必定“你的，我的”分得刷清。交關大經濟學家講過，“對私有財產要有明確界限，產權界限越清晰就必定會講誠實守信，市場交換分工合作也就有水平，形成真正的互惠互利良好環境”。上海人副吞頭勢就是如此，日常交往當中，區分人與人之間界限清晰到一分一厘。尤其是談生意，大家拿自家利益攤出來，互相尊重對方利益，而勿是一人統吃，一家獨贏。生意談妥之后定好契約，上海人又講“閑話一句”！重契約重承諾，守規矩講信用，硬橫得死脫！但是迭副上海人格吞頭勢倒俾一些外地人看作“上海人小器，斤斤計較”。講起來真是有點作孽八啦，“上海人副吞頭勢”長期被污名化，學堂里單位里過去講迭副吞頭勢是“資產階級派頭，小資產階級情調”，有事嘸事批評檢討兩句，現在格兩頂大帽子總算嘸沒了。但是最近網上出了個“慫”字，迭格是正宗格北方地區口語俗語，“慫”本字是古字“？”，網上嘸沒文化格人訛借過來。原義是驚慌恐懼，現在泛義為諷刺一個人軟弱無能，膽小窩囊，碰著要緊關頭就逃避。迭格字俾外地人套勒上海人頭啷，啊要忒勿公平！

聽來聽去講上海人“慫”，無非集中在兩點：對內，屋里廂勿像個“大老爺們”，怕老婆疼小囡，下了班做“馬大嫂”（買、汏、燒），圍只圍單廚房間里忙個不停;對外，矛盾沖突再激烈盡打嘴皮子仗，“儂哪能？”“儂哪能！”半日天勿動手！勿錯，迭兩條的確是“上海人副吞頭勢”，錯格是拿格兩條來丑化、矮化上海人形象格迭些人！

當今世界人類社會文明不斷發展，從尊重女權到了平等女權，生活中男士分擔家務是極平常格事體。勿看見前兩年網上拍攝到美國前總統小布什屋里門口倒垃圾格視頻嗎？近來網上又流傳美國財政部長廚房間里吊只大圍單汏碗，伊格老太婆適適意意坐了邊啷小臺子上白相撲克牌打通關……好講迭些男人“慫”嗎？上海男人做“馬大嫂”有點名氣，而且勿覺得是樁坍臺格事體。上海好男人就該如此，鑊鏟一捏燒兩只菜出來絕對是國宴水平。孔夫子《論語》里講過“食不厭細，膾不厭精”。《論語》是中華傳統文化的精髓，上海男人身體力行做到了，而且迭副“吞頭勢”還迎合世界潮流，嘲笑迭點格人恐怕還滯留在農耕文化初級階段吧。

上海人勿相信拳頭里出真理，只要大家講道理，用勿著狠三狠四氣勢洶洶，碰勿碰就拔拳頭，因此上海人暴力程度低是公認格共識。馬路啷公交車上吵相罵是有，有辰光交關鬧猛！不過絕大多數是“君子動口勿動手”，拔拳頭打相打格事體勿好講“絕無”也是“僅有”。常樁邊啷有人勸兩句：“好了，算了，大家少講兩句……”兩家勿袒護，雙方勿坍臺，一場風暴就可以過去，大家各走各格路。如果爭吵中有人惡語傷人，出格點閑話剛出口，邊啷人就會評判：“噯噯，大家講閑話文明點！”上海人拎得清，再勿識相，有道理也變得嘸沒道理，就此收口落蓬算數。上海閑話里邊啷勸相罵格人俗稱“老娘舅”，江南自古以來娘舅為大，囡圄出嫁娘舅嘸沒到，嫁妝勿好出腳啟程;屋里分家當板定要娘舅來主持公道。久而久之，社會上熱心主持公道排解糾紛的人就俾大家尊稱為“老娘舅”。現實生活中主動扮演“老娘舅”角色格上海人真勿少見，四兩撥千斤格社會功能，各種糾紛就勿會升級，矛盾勿會尖銳化。碰著事體講道理，暴力程度自然降低。迭格是上海人格秉性，也是現代人類文明進步表現，搭“慫”字渾身勿搭界。