我也算“說書先生”咧

錢孟林

說書志格行當我從來勿曾學過，勿過講故事倒還來是佬。隨便聽別人講一個故事之后，我能夠完整格講出來。有辰光我還拿別人講格精彩故事記下來，譬如常州卜靈望故事，九龍壺故事等，勿過志格多是幾十年前頭格老話，勿講咧。

說來也巧，2009年3月，機械一村社區開設全市唯一格社區書場——青松書場，我成只書場召集人兼義務“說書先生”。勿過，我一直搭大家講，我勿會說書，頂多是講故事。我先后自編七個常州歷史故事講撥大家聽，社區居民說叫“蠻好聽格”，我就覺得來勁佬咧。從前年10月份開始，我就嘞書場開講“常州白泰官”，到介歇一共講只十五場咧。

我講“常州白泰官”還有點來頭得。因為我搭原常州評彈團團長周玉峰老早就認只佬，社區成立書場前，我還請他來作過指導，他送拔我一本《周玉峰話本選，龍城山海經》，書當中有“常州白泰官”格頭五回，后來，我就開始講咧。有則現成話本。用勿著編寫故事咧，我省力不少嚼。勿過，我也是70歲上頭格人咧，又勿曾學過說書，介歇是“老來學皮匠”。為則講好“常州白泰官”，我花勿少功夫嚼。先要拿話本看三五遍，再嘞開講前練好幾遍。因為話本寫只好，再加上我下只功夫，所以開講“常州白泰官”以后，書場格聽眾一回回多出來，我也蠻高興格。講到后來，我勿定心咧。囊為?因為《龍城山海經》書當中只有頭五回，雖然書上格一回，我能講兩場，但總歸要講完格，這個辦呢?后來聽說周玉峰還出過一本書，上頭有后六回話本，勿過制格辰光他已過世，急撒人啊!有一天我突然想到，市圖書館有個“常州人著作室”，可以去查一查。……