王嫂走親

◎鄭慧冰

王嫂走親

◎鄭慧冰

人物：王嫂（嫂）

李小美（美）

甲女（甲）

乙女（乙）

丙女（丙）

（某日早上，爛塘村王嫂手提一籃雞蛋上場）

嫂：哎！真當氣煞人啦，我家有個表姑娘，嫁到隔壁幸福村，格兩日一毛毛個打電話來，說是蹲進了新房子，要我到伢屋里去嬉嬉。呵唷，有所嬉頭，格種城中村改造個安置房，我看也勿用看，想想就有數哉，一間間個，像雞籠，有啥做頭！乃末伢個表姑娘真當呆煞，原先家里個房子同我差勿多，有三樓三底，面積毛三百個平方，蹲蹲多少個舒敞來，乃實個不伢拆拆掉。所以我今朝準備去趟來，起殺殺克克個罵伊一頓，有介呆！呵唷，不知不覺魯迅中學門口到大哉，伢新房子說是在魯迅中學南面過紅綠燈100米就到，名字叫“幸福公寓”（撇撇嘴，邊走邊說，抬頭），鬧，“幸福公寓”來大哉！呵，兩只大獅子管門口介氣派大，右手轉圍1幢1單元101室，尋著大哉。鬧！格個死坯，樓梯門關佬大，叫我乃個進得起，扭辦法，我用我個“高音喇叭”算哉，小美，小——美。（幕后）哎——！

嫂：（貼門張望）開門，開門，我到哉！（幕后）門“蹦”一聲，自動門彈開。

嫂：（嚇一跳）真當科學大，格個可能就是伢來動話個“電子對講自動門”，外人、賊骨頭是走勿進個。（上樓敲門）“呯砰砰”小美，開開門，門開開！（里面正在做著面膜的李小美急忙出來開門）

嫂：哦！鬼，鬼，有鬼！（嚇倒在地）

美：（急撕開面膜忙招呼）王嫂是我，王嫂是我，是——我。

嫂：呵，我道青天大白日碰到“鬼”大哉！

美：鬼，哈哈，會有啥個鬼，我格是“做面膜”，來來來，請請請！呵，介客氣，雞蛋馱拉來。

嫂：雞蛋是我自生個。

美：啊，儂自生個。

嫂：噢，是我自養個雞生個，

嫂、美：哈，哈，哈。

美：來，先坐先坐。

嫂：勿客氣，勿客氣，我還是先參觀一下儂個新房子。（走向陽臺打開窗戶）呵，小美，窗門外望望綠花介多，間距介大，環境介好大。話話是一樓，陽光蠻充足，曬東曬西一些勿遮佬個。

美：勿遮佬個，伢個安置房是民心工程，精品工程動來。王嫂，聽說乃現在拆遷個話，條件還要好來，都是造小高層哉個！

嫂：啥西，小高層，我勿要，我勿要，我有恐高癥個，再話我320斤重個大塊頭，爬樓梯勿要吃力殺個。

美：呵唷，王嫂，小高層有電梯個，鬧，“得兒”個上去，“得兒”個落來，樓梯勿用爬個，像坐飛機一樣，多少個下意來！

嫂：嘿嘿，是真當嘛，扎我前半世飛機是扭坐過，后半世聽儂話大來，有電梯好乘，要不我想福大來。

美：是個，哈哈，扎儂以后天天好比坐飛機來！

嫂：嗯，好倒是好，但我要考慮考慮再話來！（繼續看房）

嫂：呵，小美，儂衛生間里乃個介清爽，浴缸、抽水馬桶介白，看起來觸眼睛大。

美：話啥西，過去伢農村里，男人登毛坑，女人坐馬桶。一個嗯嗯臭，一個臭風風，多少個難聞，多少個要勿來。

嫂：真話倒是真話，現在抽水馬桶既衛生又方便。

嫂：鬧，小美，儂個灶頭間怕佬飯勿燒個，有介清爽，一只蒼蠅都沒有。

美：蒼蠅？怕佬還會有來，伢社區里經常來檢查，啥個滅蠅、滅蚊、滅蟑格藥長期發佬個。

嫂：社區里，社區里服務真當有介好？

美：格有啥造話好講，伢社區里服務多少個好，管理多少個規范來。所以，王嫂，城中村改造真當是伢老百姓個福音啦！

嫂：好哉，好哉，啥個福音？我想想真當扭背頭，我屋里有三樓三底獨立別墅，旁邊還有一排平房、矮腳房，里面雞養養，鴨養養，蛋生生，小日子多少個“知迷”來！

美：好哉好哉，儂格種“餓殺別墅”，熱天屋里頭蒼蠅像“巖鵝”，蚊蟲像老鴨。落起雨來，呵唷唷，村堂里都是“爛汪塘”，所以乃村會叫 “爛塘村”。再話養雞養鴨，多少個臟來，假如禽流感來哉個話，人都要嚇殺個，儂不我省省好哉。

嫂（撇撇嘴）：哼哼，話大來。

美：再話我個3套新房子，我盤算得多少個好來，100平方我自己蹲；120平方給兒子做婚房；還有80平方買掉鈔票存銀行。哈哈哈，后半生，我銀行有存款，養老有保險，生活有保障，日子多少個幸福來（說完，猛一推王嫂）。

嫂：哎呀呀！你弄痛我了。

美：呵，勿好意思，王嫂，儂頸椎格老毛病怕佬還勿好動來，我倒是有好長時間勿發哉。

嫂：那儂有啥個神丹妙藥。

美：神丹妙藥么是麻將勿搓多鍛煉。儂勿曉得，伢社區里業余生活有多少個豐富來，有講座、腰鼓、唱歌、戲曲、排舞……（突然記起看手表）啊，勿對，辰光到大哉，我和姐妹們要到社區活動中心里跳排舞起哉。要不，王嫂，你與我一道跳排舞起。

嫂：我勿會跳個，勿會跳個。

美：勿要緊，伢會教儂個，走走走（拖著王嫂走一圈，朝幕后喊）偉英，小紅，阿芳——（甲乙丙三女同上）

甲：小美，儂乃個有介遲，呵，原來是 “爛塘村”個喇叭王嫂來大。

乙：王嫂，儂乃個越來越胖哉。

嫂：是話佬，我也勿曉得。可能事體不做，麻將搓搓，包紅心打打，人坐胖哉啦！

乙：介胖，要生“三高”個。

丙：呵呵，儂格種生活方式伢老早BY BY哉。王嫂，聽說乃“爛塘”村也要拆遷哉，扎儂也要做新居民哉，我看儂還是趁早加入伢格隊伍。

美：呵喲，到目前為止，伊還思想勿通，房子不肯拆動來。

甲乙丙（合）：是真當！

甲：王嫂，城中村改造是政府為伢老百姓辦個大實事呀，扎儂真當呆煞動哉！

嫂：（有點難為情）乃真當勿曉得，我屋里頭有三樓三底，多少個勿割所來呵。

乙：哎唷唷，產權面積是“拆一還一”個，再加上新房子增值，儂算算帳看，有多少個好背來。

丙：舍小家，為大家，過去儂“喇叭王嫂”為人直爽有名個，凡事都帶頭，今朝乃個變得介銹扭起來哉。

甲：生活環境美，生活質量高，格才是伢現代人所追求個。

美：耳聽為虛，眼見為實，姐妹們，伢還是帶伊一起去小區里參觀參觀。

甲乙丙（合）：好個，好個！

甲（快板音樂起，繞一圈）：儂來看，小區路面光溜溜，公交直達家門口。

乙：再來看，銀行就在伢身邊，超市進出多方便。

丙：還有那，文化中心社區建，學校、幼兒園一起連。

甲乙（合）：花草遍地，

丙美（合）：綠樹成蔭，

甲乙丙美（合）：儂話像勿像公園，像勿像公園？

嫂：像個，像個！扎今朝我真當好比是劉姥姥進大觀園哉！

美：我看儂呵，真當是劉姥姥，扎到現在儂有有打算動來！

嫂：打算？（堅定地）有！打算回去接受城中村改造，積極主動要求拆遷，并且還要發揮我這個“高音喇叭”個功能，把我在幸福村看到個新事物、新氣象統統告訴不伢爛塘村個鄉親們，向她們宣傳改造后個新家園有介好（豎大拇指）！

甲乙丙美（合）：嗨！格才是伢心目中個“喇叭王嫂”。美：姐妹們，格末伢唱起來跳起來！

《最炫民族風》音樂起——跳排舞（王嫂學跳）——造型（王嫂中間作可愛狀），結束。

（作者系浙江紹興市越城區城南街道綜合文化站站長）

（責任編輯 劉冬楊）